Platform Hong Kong打工仔，無論係散仔定高層，只要唔係老細，就一定會遇過以下情況，無論你做得好唔好、甚至係跟住老闆嘅意思去做，結果都會有唔同人去鬧你同怨你。每個月的team lunch表面上係民主決定，但老闆已經明示暗示要食意大利菜，開完例會講咗句︰「Ronald，你搞掂佢」就走咗去，我知道單嘢我已經上咗身。
lunch時間只有一個鐘，但要食意大利菜，根本就係一個好唔文明嘅行為。唔計揸車來回嘅時間，頭頭尾尾starter加main course加埋dessert要45分鐘完事，唔咬倒晒入個口都唔夠時間啦，請問咁樣點可以team building呢？成件事徹頭徹尾只係形式主義，為做而做。不過，做細千祈唔好俾咁多意見，快快搞掂，其他事Who fuckin’ cares?
間餐廳要近公司（避免遲到）又要合老闆budget（要得體又唔可以貴）又要食意大利菜，結果我揀咗又一城間Amaroni’s，估唔到惡夢從此開始。秘書Lucy同佢IT班兵首先起哄，話反正老闆請，點解唔食貴啲去Sabatini，又話set lunch任食starter堅正。我心諗，大姐大，4個course一位四百幾，未食stater我已俾老闆gameover，你想食叫你班兵請你喇。跟住茶水霞姐又走過嚟，問我點解唔食中菜，仲話龍景軒點心好食。嘩，米芝蓮，霞姐你真識食。
一人一把咀，各自各利益，係又屌唔係又屌，做人就係咁慘。
文︰曹厚
