今年四月當大家聽到香港Apple Store推出trade in服務，心中可能興奮了一陣子，但當知道只回收Iphone及Ipad時，再加上回收價「低到冇朋友」仲衰過收機佬，一眾朋友仔才死咗條心。原來Apple Store又靜悄悄的「擴展」了這項服務，連Android同WP都可以trade in，仲提供埋估價網址(請按此)，當然要上去睇睇咩料。

大家最關心係回收價如何，我試咗幾部機，部份(我強調係部份)回收價算係市場水平。以我閒置的LG上代機皇G3為例，外面市場價跌到hihi，近日問過收機佬平均收你$500-600，有條阿叔$300蚊都夠膽開口，網上私放價錢會好少少，放到$1000左右。根據Apple Store提供的估價網址，收你$650，算係正常收機價。

唔好咁開心住，我上兩段強調係「部份回收價算係市場水平」，即係有伏啦。點中伏法？試試Iphone回收價就知，簡直你侮辱價，睇到你會寧願丟x咗落海都唔會放俾佢。以Iphone 5S 16G / 太空灰為例，收$1195，睇到堅係眼火爆，接唔接受到呢口價，就真係睇你個人底線。

個價得$1195，接唔接受到真你好睇個人底線。

大家唔好鬧住，呢口價係Apple嘅「合作夥伴」提供。

講到尾，咪又係收機佬囉，不過係高級收機佬之嘛。